8
(Dominica in Sexagesima, pg. 275)
4 Iniquac tlalticpac monemityaya tecuyo J. X., ceppa cencamiyequintin macehualtin miyeccan altepetlipan huallaque, inixpantzinco mocentlalique; auh inyehuatzin tecuyo J. X. machiyotlatoltica quinmomonochili quinmolhuili:
5 Ceppa cetlacatl yaqui inimilpan quichayahuato inixinach; auh inyequichayahua inxinachtli, cequi ohtenco chayahuac, auh oncan quiquequezque, yuan totome patlantinemi quiquaquaque.
6 Auh cequi tetlipan chayauh, inohualixuac çan onuac, yehica amotlacuechahua inoncan.
7 Auh incequi chicalotitlan xocohuitztitlan tepehuito, auh niman ixuac chicalutl çan quiximicti.
8 Auh incequi qualcan yectlalpan inchayahuac, inoixuac, cenca huelitechtlamochyuh, incentl xinachtli macuilpohualli inicmotlapihui. Inoquimitalhui intecuyo, niman cenca omotzatziti, quimitalhui: Inaquin huellacaqui, maquicaqui y.
9 Auh initlamachtilhuan quimotlatlahuilique, quimolhuilique: Tleinezca inin machiyotl?
10 Intecuyo quinmolhuili: Inamehuantin amomacehualtin inhuelanquicaquizque inhuey inohui teotlatolli inic huillohua ilhuicac, inoccequintin çanyeyo machiyutl inquicaquizque, inic yehuantin tlachya amo tlachiyazque, auh intlacaqui amotlacaquizque.
11 Auh izcatqui ininezca: Inxinachtli ipanpohui initlatoltzin dios.
12 Auh inxinachtli inçanotenco tepeuh, itechpa mocaqui inyehuantin quicaque teotlatolli; auh niman huallauh intlacatecolutl quincuilya, quinpololtya inteotlatolli inoquimoyollotiquiça, inicamo tlaneltoquiliztica momaquixtizque.
13 Auh inxinachtli inçantetlipan chayahuac, intechpa mocaqui inyehuantin huelquipaccacaqui teotlatolli, çanamo yimitic monelhuayotya, yehica caçan quexquichcahuitl intlaneltoca, auh iniquac tolinilo, niman quicahua.
14 Auh inxinachtli inchicalutitlan inxocohuitztitlan chayahuac, innezca inyehuantin quicaqui teotlatolli, auh çaniquihiyomiqui inin netlaecoltilliz, inimaxca initlatqui, yuan inimaquallaelehuiliz, icatlequalli quichihua.
15 Auh inxinachtli yectlalpan chayahuac, innezca incencaqualli inyollo inquipaccacaqui inhuelquimonemiliztya yollotya teotlatolli, miyectlamantli qualli quichihua tlapaccaihiyohuiliztica.