5
(Dominica IV.ª Post Pentecosten, pg. 328)
1 Iniquac tlalticpac monemityaya tecuyo J. X., ceppa macehualtin conmololhuilique, inic quicaquizque itlatoltzin dios, auh inyehuatzin tecuyo atenco moquetzinoticaca itocayocan Genesareth.
2 Auh oncan quimottili ontetl acalli atenco onoya; auh intlatlamaque atenco hualquizca, yuan quiyectyaya, quitlacuicuilyaya ininmatl.
3 Niman ceccan acalco omotemohui, yacalco inSymon, quitlatlauhti inSymon inic achi quitzinquixtiz acalli quicahuaz inatentli. Auh inoonmohuetziti, niman ya oncan quinhualmomachtilya imacehualtin.
4 Auh inotzonquiz itemachtiltzin, niman quimonahuatili inSymon, quimolhuili: Ahuecatlan xicuicacan inacalli, yuan ompa xicçohuacan inamomatl inic antlatlamazque.
5 Auh inSymon quimonanquilili, quimolhuili: Totemachticatzine, cayecenyohual inotinentlamatque, çan ayac oticacique; auh inaxcan canel motencopatzinco maçaocnoconçohuan matlatl.
6 Auh iniquac oconçouhque matlatl, cenca miyequintin inmimichtin quinmatlahuique, yuan yeic cocotocaya inmatl.
7 Niman quimomanotzque inimicnihuan inocce acalli icnenca, inic huallazque yuan quinpalehuizque. Auh inohuallaque, inimacal iyomexti quitetemitique inmichin, cenca icpolaquiz nequya.
8 Auh inyehuatl Symon Pedro, inoquittac y, mixtlapachtlaz yicxitlantzinco intecuyo J. X., quimolhuili: Totecuyoe, maxinechmotlalcahuili, canitlatlacohuani.
9 CainPedro cenca icmiçahui, yuan inixquichtin oncan catca, inic cenca miyec omacic michin.
10 Noyehuantin cenca tlamahuiçoque inipilhuan Zebedeo, inJacobo yuan Juan inicnihuan Symon. Auh intecuyo J X. quimolhuili inSymon Pedro: Macamo ximomauhti, cainye ompatitztihui tlaca intiquimaciz.
11 Auh iniquac, ocanque imacal, inoquitlalhuaccaquixtique, niman ixquich quicauhtiquizque inimaxca, quimotoquilityaque intecuyo.
(Feria Sexta Quatuor Temporum, pg. 238)
17 Iniquac tlalticpac monemityaya tecuyo J. X., ceppa cemilhuitl mochyuh; auh intecuyo J. X. mehuititi catca motemachtilyaya. Yuan inphariseome noehehuati catca yuan inteotlatolmatinime, innohuiyan altepetl ipan hualehua inompa galilea, yuan Judea, yuan hierusalem; yuan inichicahualiz tecuyo hueloncatca inicquinmopahtiliz.
18 Auh izcatqui cequintin tiyacahuan cetlacatl quinapallotihuetze itlapechco, onotihuitz intixihuiya, yuan quitemohuaya inictetlan conaquizque, yuan ixpantzinco quimotequilizque.
19 Auh inamoquitta incanin tetlan conaquizque, ipampa cenca miyec tlacatl, tlapanco tlecoque, quihualpiloque çanic huallonotya initlapech tlanepantla ixpantzinco quitecaque intecuyo J. X.
20 Auh inyehuatzin inoquimottili intlaneltoquiliz, quimolhuili: intimacehualli tipopolhuillo inmotlatlacol.
21 Auh intlamatinime yuan phariseome niman icquilnamicque, quitoque: Aquin y inquichicoitohua dios? Cuix aca huelquitepopolhuya intlatlacoli, amoçan hueliceltzin indios?
22 Auh intecuyo J. X. inoquinmottili intlalnamiquiliz, quinmonanquilili, quinmolhuili: Tleica inanqualli amitic anquilnamiqui?
23 Catlehuatl inoccenca huelamoohui icmitohua: cuix ye intipopolhuilo motlatlacol; anoce inicmitohua: ximoquetza, yuan xinenemi?
24 Auh inic anquimatizque, cainichpuchtli iconetzin imacca ihuelli inic quitepopolhuiz tlatlacolli tlalticpac, (quimolhuili initixihui): Nimitzilhuya, ximoquetza, xicuica inmotlapech, yuan ximohuica inmochan.
25 Auh niman moquetztiquiz imixpan, conan initlapech inoncan onoya, yuan yaqui inichan, cenca quimoyectenehuili indios.
26 Yuan ixquich tlacatl miçahui, cenca quiyectenehuaya indios, yuan cenca huelmomauhtique, quitoque: Cainaxcan otiquittaque cenca mahuiztic.