24
(Feria Secunda Paschæ, pg. 209)
13 Omentin itlamachtilhuan intecuyo J. X. hueliquac cecca altepetl ipan mohuicaya itocayocan Emaus, enetlalloli ocachi ipan inicquitzticatca hierusalem.
14 Auh inyehuantin nepanotl inononotztihuiya itechpa inixquich inomochyuhca.
15 Auh mochyuh, iniquac yemonotztihui yuan inyenetech motlatlahuya, intecuyo J. X. quimomaxilito quinmohuiquilyaya;
16 Auh inimixtelolo çanyeleltilloya, inicamo quimiximachilique.
17 Inyehuatzin quinmolhuili: Tlein intlatolli, innepanotl anquinmolhuitihui, yuan antlaocoxtihui?
18 Auh ceyehuantin itoca Cleophas quimonanquilili, quimolhuili: Çanmocel intihuecatlacatl tinenenqui inica hierusalem, auh amoticmati intlein oncan omochyuh inyeizquilhuitli?
19 Inyehuatzin quinanquili, quimolhuili: Tlein? Quimolhuilique: itechpa titlatohua inJesus nazareno, inhuey propheta, yuan chicahuac inipan itlachihual yuan ipan itlatol yixpantzinco indios, yuan imixpan inixquichtin macehualtin;
20 Yuan inquenin temac oquicauhque inhuehueintin teopixque, yuan totlatocahuan inicquimictizque, yuan oquimamaçohualtique.
21 Auh intehuantin titomatya caquinmaquixtiz inisraeltlaca; auh occenca ictinentlamati inaxcan ic eilhuitl inmochyuh y.
22 Yece cequintin cihuatzitzintin totechpohui otechiçahuique, yehica oc yohuatzinco oyaca inompa onoc tepetlacalli,
23 Auh inamotle quitta inacayotzin, huallaque, quitoque, oquimittaque angelome inquitoque caoyol.
24 Auh cequintin tehuan oyaque inompa onoc tepetlacalli, çanoyuh quittaque inyuh quitoque cihuatzintin.
25 Auh inyehuatzin tecuyo quinmolhuili: Iyo inaanquimamati, inayaxcan quineltoca amoyollo inixquich quitoque prophetame;
26 Cuixamo yuh oquinec inmotlaihiyohuiltiz Xristo, inic ihuihuin mocalaquiz inipan itlatocayotzin?
27 Auh itech quimopehualtili inmoysen, yuan ixquichtin prophetame, quinmelahuilyaya inixquich teotlatolli initechpatzinco icuilyuhticatca.
28 Auh onacique inoncan altepetl ipan, inompa tlamatihuiya; auh inyehuatzin çanquimopiquili inhueca motlamachitityuh.
29 Auh quicuitlahuiltyaya, quimolhuilyaya: Totecuyoe, matotlan ximohuetziti, ca yeonyohua; oonac intonatyuh. Auh inhuan onmocallaquitzino.
30 Auh mochyuh, iniquac yeintlan motlaqualtizquya, conmocuilli intlaxcalli, quimoteochihuilti, yuan quimotlatlapanili, yuan quinmomamaquilyaya.
31 Auh inyehuantin niman itlatlapouh inimixtelolo, yuan quimiximachilique; auh inyehuatzin çanimixpan ompolyuh, aocmo quimottilique.
32 Auh nepanotl quimolhuique: Cuixamo yuhqui tlatlaya toyollo iniquac otlica techmononochilyaya, yuan intechmomelahuililyaya teotlatolli?
33 Auh niman hueliquac moquetzque, yenoceppa yaque inhierusalem; yuan inpan acito omocentlalique inmatlactin omome apostolome, yuan ixquichtin inintlan catca,
34 Quitohuaya: Canelli omozcallitzino intecuyo, yuan oquimottili inSymon.
35 Auh inyehuantin quipohuaya inixquich mochyuh otlica, yuan inquenin quimiximachilique iniquac quimotlatlapanili tlaxcalli.
(Feria Tertia Post Pascha, pg. 212)
36 Iniquac mozcalitzino tecuyo J. X., innepantla moquetzino initlamachtilhuan, yuan quinmolhuili: Ma amotlane intlamatcayeliztli: canehuatl; macamo ximomauhtican.
37 Auh inyehuantin motlapololtique yuan mauhtique, inmomatya caçan spiritu inquitta.
38 Auh intecuyo quinmolhuili: Tleica amotlapololtya, yuan intlalnamiquiliztli amoyollo ipan tleco?
39 Xiquittaca inoma yuan nocxi, cahuelnehuatl; xinechmatocacan, yuan xiquittacan, cainespiritu atle onca inacayo yuan iyomiyo, inyuh nehuatl anechitta notechca.
40 Auh inoconmitalhui y, quinmottitili inimatzin yuan icxitzin.
41 Auh iniquac ocnoma amotlaneltoca, yuan tlamahuiçohuaya papaquiliztica, intecuyo quinmolhuili: Cuix itla nican anquipia intlein moquaz?
42 Auh inyehuantin quimomaquilique achiton michin tlatlehuatzalli, yuan ineucyo mimiyahuatl.
43 Auh inye oimixpan onmotlaqualti, conmocuilli intencahualli, quinmomaquili,
44 Yuan quinmolhuili: Cayehuatli intlatolli inamechilhui, iniquac oc amotlan nicatca, cahuelmonequi mochihuaz, neltiz inixquich notechpa icuilyuhtica inipan itenahuatiltzin moysen, yuan intlatol prophetame, yuan ipan psalmos.
45 Quiniquac quinmotlapolhuili inintlacaquiliz, inic quicaquizque teotlatolli,
46 Yuan quinmolhuili: Ca yuh icuilyuhtica, yuan ca yuh monequya inmotlaihiyohuiltiz Xristo, yuan eilhuitica mozcalitzinoz intlan mimicque;
47 Yuan ipampa itocatzin temachtilloz tlamacehualiztli, inic ixquich tlacatl popolhuiloz itlatlacol.