2
(In Nocte Nativitatis Domini ad Primam Missam, pg. 372)
1 Iniquac yemotlacatiliz totecuyo J. X., oquiz itenahuatil inCesar Augusto, inic micuiloz ixquich cemanahuac altepetl.
2 Inin altepetlacuiloli achtopa quichyuh inCirino inSiria presidente;
3 Auh ixquich tlacatl cecenyaca ohuya inialtepeuh ipan, inic micuilozque inipampa tequitl.
4 Auh noyehuatl inJoseph ompa hualmehuiti inGalilea initechpohui altepetl Nazareth, ompa motlecahui inJudea, inumpa yaltepeuh David itocayocan Bethlem, yehica caitechquiz initlacamecayo David.
5 Icmohuicac, inic ipampa tequitl nehuan micuilozque santa maria ininamictzin, inyeotztli catca.
6 Auh niman mochyuh iniquac yeompa moetzticate, otlainmantic inic motlacachihuiliz.
7 Auh quimotlacatilili iniconetzin iyacapantzin inçanhueliceltzin ehua; niman tilmatzintli icquimoquimilhui, yuan conmotequili inoncan mamaça intlaquayan, yehica caoccan huelli intecochitiloyan.
8 Auh inipan altepetl oncan nenca ichcapixque yitzticatca amocochya, inpampa inimichcahuan cenyohual inquinpyaya mopapatlaya.
9 Auh niman oncan intlan hualmoquetz iniAngel Dios, yuan initlanetzin Dios quinyahualotimoman, yuan cenca momauhtique.
10 Auh niman quimilhui inAngel: Macamo ximomauhtican; ca izcatqui huey papaquiliztli innamechilhuya, inic mochintin papaquizque macehualtin;
11 Yehica caaxcan topampa omotlacatili intemaquixtyani, inyehuatzin X. tlatohuani, ompa yaltepeuh ipan David.
12 Auh izca icanquiximatizque; anquittazque piltzintli tilmatzintli icquimoquimilihuititoc, yuan mamaça intlaquayan monoltitoc.
13 Auh initlan Angel niman icyuhca huallaque cenca miyequintin angelome inilhuicac yaoquizque, quimocenyectenehuilyaya inDios, yuan quitohuaya:
14 Inilhuicac incenca aco mamahuiztililo inDios, yuan tlalticpactlaca mapaccanemican inqualli inceaya intlanequiliz.
(In Secunda Missa Nativitatis Domini, pg. 374)
15 Inichcapixque nepanotl mononotzaya, quitoaya: Matonacican inumpa Bethlem, yuan matiquittacan inin oquimochihuili totecuyo, yuan otechmottitili.
16 Auh niman huallaque, cenca hualicyuhtyaque; yuan oncan quimottilique inSantamaria, yuan inJoseph, yuan inpiltzintli mohuetzititoc inintlaquayan mamaça.
17 Auh inoquimottilique huelicinyollopachyuh intlatolli, inilhuiloque initechpatzinco inpiltzintli.
18 Auh inixquichtin inquicacque tlamahuiçoque initechpa y inquimilhuique ichcapixque.
19 Auh inSanctamaria huelquimopialyaya inixquichy intlatolli, icmoyolnonotzaya.
20 Auh niman mocuepque inichcapixque quimohuecapanilhuityaque, yuan quimoyectenehuilitihuyaque inDios ipampa inixquich quicacque yuan quittaque, inyuh ilhuiloque.
(In Festo Circumcisionis Domini Jesu, pg. 383)
21 Iniquac oquiz chicueilhuitl inicachi quimotequilizque inacayotzin piltzintli, quimotocayotilique Jesus, inquitoco Angel, inayamo yitictzinco motlalya itlaçonantzin.
(In Festo Purificationis Virginis Mariæ, pg. 388)
22 Iniquac yeotzonquiz inizquilhuitl yemochipauhtzino insanta maria, inyuh catca itenahuatil Moysen, intotecuyo J. X. ompa quimohuiquilique inHierusalem, inic yixpantzinco quimoquechilizque intotecuyo,
23 Inyuh icuilyuhticatca ipan itenahuatiltzin totecuyo: Cainixquichtin oquichtin inyancuican tlacatizque, motocayotizque cenquizcaqualtin, itettzinco pohuizque intotecuyo.
24 Yuan inic quimomanilizque huentzintli, inyuh icuilyuhticatca ipan itenahuatiltzin Dios, onteme cocome, anoço onteme huilococome.
25 Auh izcatqui cetlacatl ompa moetzticatca inHierusalem, itoca Simeon, auh inyehuatli cenca huelqualli iniyollo yuan mauhcanemya, quimochialitinenca ininyollaliloca israellaca, auh itic moetzticatca inSpiritu Sancto.
26 Auh inyehuatzin inSpiritu Sancto quimolhuili, caayamo quimottiliz inmiquiztli, intlacamo achtopa quimottiliz inXristo tecuyo.
27 Auh hualmohuicac inuncan teopan, inyuh quimoyollotili Spiritu Sancto. Auh iniquac yequimohuiquilya teopan piltzintli Jesus initatzin, ininantzin, inic ipampa quimochihuilizque inyuhca nahuatilli;
28 Inyehuatl Simeon conmonapalhuili, yuan quimoyectenehuili inDios, yuan quito:
29 Inaxcan, totecuyoe, ihuyanpacca yeticmocahuilya inmotetlaeculticatzin, inyuh catqui motlatoltzin;
30 Yehica canixtelolotica onicnottili inmotemaquixtyayatzin,
31 Inocencahuili inimixpan ixquichtin macehualtin.
32 Tlanextli tlahuilli ictlanextililozque intlateotocanime, yuan icmahuiztililozque inmomacehualhuan Israellaca.
(Dominica Infra Octava Nativitatis Domini, pg. 259)
33 Iniquac teopan quimohuiquilique tecuyo J. X., inJoseph yuan insancta Maria initlaçonantzin cenca quimahuiçohuaya inixquich mitohuaya itechpatzinco.
34 Auh inSymeon quimoteochihuili, yuan niman conmolhuili insancta Maria ininantzin tecuyo: Izcatqui cainitechpa motlaçoconetzin miyequintin inisraellaca motlapololtizque, auh nomiyequintin momaquixtizque; yuan machiyutl yez, auh çanmiyequintin inquitlahuelnamiquizque.
35 Noyuan inipampa itlaihiyohuiliztzin, yuhquima aca tepuzmaquauhtica, quixiliz moyollotzin, inic neciz intlein cequintin quilnamiquizque itechpatzinco.
36 Auh iquac cetlacatl nenca cihuatzintli itoca Anna prophetissa, ichpuch Phanoel, itechquiz initlacamecayo in Asser. Auh inin cihuatzintli cenca miyec xiuhtic, oc huelichpuchtli monamicti, çanchicoxihuitl inintlan nenca inamic.
37 Auh inomic inamic, napohualxihuitl onnahui inçanyuhnenca, tlacenmatya inteopan miyecpa moçahuaya, incemilhuitl incenyohual miyecpa quitlatlauhtyaya intecuyo.
38 Auh inin cihuatzintli hueliquac ompa tepan acito, cenca quimoyectenehuilyaya intecuyo, yuan itechpatzinco quinnonotzaya inixquichtin quichixtinenca ininmaquixtiloca israellaca.
39 Auh inoconmochihuilique inyuh catca itenahuatiltzin tecuyo, niman mohuicaque inichan Nazareth initechpohui galilea.
40 Auh inpiltzintli mozcaltyaya yuan mochicahuaya icmotemiltiti catca inteotlamatiliztli; auh itlantzinco catca iningratia dios.
(Dominica Infra Octava Epiphaniæ, pg. 261)
42 Intecuyo J. X., inyeyuh matlacxihuitl omome motlacatili, ininantzin yuan inJoseph ompa quimohuiquilique inhierusalem teopan, inyuh mochihuaya iniquac ilhuitl quiçaya.
43 Auh inyeyuhqui inoonquiz ilhuitl, iniquac yehualmocuepa, amoquimatque incaompa mocauhtzino hierusalem inpiltzintli Jesus,
44 Aut inmomatque aço motehuiquilya, auh inye cemilhuitl nenemi, quimotemolyaya inintlan inhuanyolque yuan inquimiximatya.
45 Auh inancan quimottilya, noc huelmocuepque inompa hierusalem, quimotemolito.
46 Ye ic yeilhuitl inquimottilique ompa teopan innepantla mehuititica intlamatinime, quimocaquitya inintlatol, yuan quimotlatlahuilya.
47 Auh inixquichtin quicaque itlatoltzin cenca tlamahuiçohuaya yuhqui miçahuiyaya iniccenca mimatya iniccenca huelmotlananquililyaya.
48 Auh inoquimottilique, cenca quimomahuiçalhuique. Auh ininantzin quimolhuili: Notlaçoconetzin, tleica inyuh quitopan oticmochihuilitzino y? Izcatqui cainmotatzin yuan innehuatl cenca otitotolinitinenque inicotimitztotemolyaya.
49 Auh intecuyo quinmolhuili: Tleica y noannechmotemolyaya? Cuix amo anquimomachitya ca monequi cenca nicnocuitlahuiz intlein quimonequiltya notlaçotatzin dios?
50 Auh inyehuantin amocenca quicaque intlein quimitalhuiz nequya inic quinmonanquilili.
51 Auh niman huelmotemohui, niman quinmohuiquili inompa Nazareth; noyuan quinmotlacamachityaya. Auh ininantzin inixquichin tlatolli huelihitic quimopielitinenca, icmoyolnonotzaya.
52 Auh intecuyo J. X. mozcaltitzinohuaya inipan teotlamatiliztli, yuan ingratia, yuan manaya ininacayotzin inixpantzinco tecuyo dios, yuan inimixpan tlaca.