18
(Dominica X.ª Post Pentecosten, pg. 340)
9 Iniquac tlalticpac monemityaya tecuyo J. X., quinmononochili cequintin mochicahuacamatya, yuan moqualtocaya, çan quitelchihuaya inoccequintin inhuampohuan, machiyutl quinmotlalilili, quinmolhuili:
10 Caomentin teopan tlecoque, tlatlatlauhtito; cePhariseo, inoccetlacatl Publicano.
11 Auh inyehuatl Phariseo nepohualiztica intlatlatlauhtyaya, quitohuaya: Totecuyoe, nimitznotlaçocamachitya, camonyuhqui, camoniquinnenehuilya inoccequintin tlalticpactlaca: inichtequini, inamo melahuac inemiliz, intetlaxinque; amono nyuhqui inicanicac Publicano.
12 Cainnehuatl inchicometica oppa ininoçahua; cainixquich notlatqui intlamatlactetilya, icmixpantzinco nitlamana.
13 Auh inyehuatl Publicano çanhueca inicaca amo motlapalohuaya inacotlachiyaz; çan meltepinyaya, quitohuaya: Diose, maxinechmocnoittili initlatlacohuani.
14 Niman icquimitalhui: Çanelli namechilhuya: inin Publicano occenca yechipahuac inianima inhualtemoc teopan, inyaqui ichan, quipanahuya inPhariseo; yehica inixquichtin mohuecapanohua, tlanitlaçalozque; auh inmocnomati, huecapanolozque.
(Dominica in Quinquagesima, pg. 278)
31 Intecuyo inoc tlalticpac monemityaya, quinmononochili inmatlactin omomen itlamachtiltzitzihuan, caichtaca quinmononochili, quinmolhuili: Tlaxontlachyacan, cayetitlecotihui inHierusalem, auh inichpuchtli iconetzin ompa ixquich ipan mochihuaz inquitotyaque prophetame.
32 Cainmactlaçaloz intlateotocanime, yuan quequeloloz, yuan mecahuitecoz, noyuan ichichaluz.
33 Auh iniquac oquimecahuitecque, quimictizque, auh eilhuitica muzcalitzinoz.
34 Auh inapostolome niman atle quicacque initlatoltzin tecuyo, yehica capolyuhticatca ininhuicpa, amono quicacque inmitohuaya.
35 Auh inyeyuhqui intecuyo J. X. inyeonmaxitityuh inompa Jerico, cetlacatl ixpopuyotzin ontenco tepalmotlaitlaniti catca.
36 Auh iniquac oquicac inmiyectlacatl oncan quiçaya, niman tetlatlani intlein icmochihua.
37 Quilhuique, canican moquixtya inJesus Nazareno.
38 Iniman tzatzic, quito: Jesu Xristoe, intipiltzin David, maxinechmotlaocolili.
39 Auh inquimoyacanilityaya tecuyo quitlacahualtyaya inic mocahuaz. Auh inyehuatl ilhuice tzatziya, quitohuaya: Intipiltzin David, maxinechmotlaocolili.
40 Auh intecuyo icniman moquetzino, motlanahuatili inic ixpan hualhuicoz. Auh inoixpantzinco acito, quimotlatlanili,
41 Quimolhuili: Tlein ticnequi mopan nicchihuaz? Auh inyehuatl quito: Totecuyoe, canitlachiyaznequi.
42 Auh intecuyo J. X. quimolhuili: Xitlachya, motlaneltoquiliz inomitzmaquixti.
43 Auh niman icyuhca tlachix, yuan quimotoquilitya intecuyo, quimoyectenehuili. Auh inixquichtin quittaque y, mochintin quimoyectenehuilique intecuyo.