15
(Dominica III.ª Post Pentecosten, pg. 326)
1 Iniquac tlalticpac monemityaya tecuyo J. X., inpublicanos yuan tlatlacohuani ixpantzinco yaque, inic quimocaquitizque.
2 Auh inyehuantin Phariseome yuan tlamatini icquimochicoitalhuiyaya, quitohuaya: Inin quincelya intlatlacohuani, yuan intlan tlaqua.
3 Auh inyehuatzin tecuyo izcatqui machiyotlatolli quinmotlalilili, quinmolhuili:
4 Intla aca amehuantin macuiltecpantin onnemi yichcahuan, intla centetl quipoloz, cuixamo niman quauhtla quincauhti quiçaz innauhtecpantli oncaxtolli onnahui, amo niman quitemotyuh incentetl opolyuh, inixquichcahuitl quittaz?
5 Auh iniquac oquittac, quimoquechpanoltya;
6 Auh inohualla ichan papaqui, niman quincentlalia inicnihuan, yuan inicalnahuactlaca, quimilhuya: Manohuan xipapaquican, caoniquittac innochcauh opolyuhca?
7 Yenamechilhuya, çanoyuh papacohuaz inilhuicac inipampa cetlacatl tlatlacohuani intlamacehua, amocenca yuh ipampa netlamachtilloz inauhtecpantli oncaxtollonahui yecnemilizceque, inamo intechmonequi tlamacehualiztli.
8 Auh intla aca cihuatl, quipiya matlactetl iztac teocuitlatl, intla centetl quipoloz, amo niman tlahuitinemiz, amo nohuiyan nemiz inichan, amo cencahuelquitemoz, inixquichcahuitl quittaz?
9 Auh inonez, amoniman quinnonotzaz inicihuapohuan, yuan inicalnahuactlaca, amoniman quimilhuiz: Manohuan ximopapaquiltican, caoniquittac inteocuitlatl inonicpoloca?
10 Yenamechilhuya, çanoyuh papacohuaz inilhuicac inimixpan iangelohuan dios, inipampa cetlacatl tlatlacohuani inmonemitizcuepa.
(Sabbato Post Dominicam II. Quadragesimæ, pg. 113)
11 Iniquac tlalticpac monemityaya tecuyo J. X., quinmolhuili initlamachtilhuan inintlatol machiyotl: Cetlacatl omentin oncatca ipilhuan:
12 Auh inteiccauh +Manifestequilhui initatzin: Notatzine, maxinechmomaquili inixelyuhca motlatquitzin innotechpohui. Auh quixelhui initlatqui.
13 Auh çaniquezquilhuiyoc, inixquich quinechico, inteiccauh inipiltzin cenca ompeuh hueyaltepetl ipan, yuan ompa mochi quipopollo initlatqui inicahuilnenca.
14 Auh iniquac omochi contlami, niman momanaco huey mayanaliztli inoncan nenca, auh inyehuatl nimaye motolinitinemi.
15 Niman oyaqui, itlan ocalac cetlacatl altepehua inoncan nenca, yuan imilpan quihua inic pitzopiaz, quintlaquaqualtiz pitzome.
16 Yuan cenca quelehuyaya inmaic ixui ahuatomatl, inquiquaya pitzome; çanayac quimacaya.
17 Auh inomolnamic, quito: Quexquichtin intlaquehualtin ichannemi notatzin cenca miyec inintlaxcal, auh innehuatl nican napizmictineni!
18 Ninoquetzaz, nicnotoquiliz motatzin, nicnolhuiliz: Notatzine, cailhuicacpa onitlatlaco, yuan mixpantzinco;
19 Aocmo nolhuil initocayotilloz inmopiltzin; maipan xinechmomachiti inyuhque ceme motlaquehualtzitzihuan.
20 Niman hualmoquetz, quihualtocac initatzin, yuan iniquac ochuecahuitz, oconittac initatzin; niman huelmoicnoyohuac iniyollo cenca omotlallo iquechpan mopiloto, yuan quitennamic.
21 Auh inipiltzin quilhui: Notatzine, ilhuicacpa onitlatlaco, yuan mixpantzinco; aocnolhuil initocayotilloz inmopiltzin.
22 Auh initatzin quimilhui initetlaecolticahuan: Icyuhca xiqualcuitihuetziti inoccencatlaçotli tilmatli, yuan xoconaquican, yuan imacxoconaquilican matzatzaztli, yuan xiccactican;
23 Yuan xicanatin iniconeuh quaquahue inyehuatl incenca tomahuac, yuan xicmictican; tiquazque, tipachihuizque;
24 Cainin nopiltzin omicca, auh omozcalli; opolyuhca, onezqui. Niman icpeuhque yatlaqua.
25 Auh inocce ipiltzin inteteachcauh milpan nenca; iniquac yehuitz, inyehuallaci ichan, niman oquicac intlapitzalli Simphonia yuan choro.
26 Oconotz ce itetlaecolticauh, yuan oquitlatahui, quilhui: Tlein y?
27 Auh quilhui: Ohualla inmoteiccauh, yuan inmotatzin oquimicti ceiconeuh quaquahue yehuatl incenca tomahuac, yehica camaquiz oquiceli inmotatzin.
28 Niman omoyollitlaco, aocmo oncalaquiznequya; auh initatzin hualquiz nimaya icquitlatlauhtya.
29 Auh inyehuatl quinanquili, quilhui initatzin: Izcatqui yeizqui xihuitli innimitztlaecoltya, yuan aic çanoniccauhtiquiz inmotenahuatil, anoic centetl otinechmacac iniconeuh quaquahue, inintlan nocnihuan niquazquya;
30 Auh inin mopiltzin, iniquac ocontlami inyaxca inahuiyanime, oquinmamacac, yeoticmictilli iniconeuh centetl quaquahue incenca tomahuac.
31 Auh inita quilhui: Nopiltzine, intehuatl mochipa notlantica, auh inixquich notlatqui camochimaxca;
32 Auh inaxcan monequya titlaquazque yuan tipapaquizque; yehica cainin moteiccauh omicca, yuan omozcalli; opolyuhca, onezqui.