11
(In Letaniis Majoribus, pg. 223)
5 Iniquac tlalticpac monemityaya tecuyo J. X., quinmolhuili initlamachtilhuan: Inamehuantin aquin onyez icnyuh, inyohualnepantla ipan calaquityuh, yuan quilhuiz: Nocnyuhtzine, xinechmotlaneuhtili etetl tlaxcalli,
6 Yehica caonacico nocnyuh, yuan atle oncan intlein nicmacaz,
7 Auh inyehuatl çancalitic inquihualnanquili, quilhui: Macamo xinechotihui, macamo xinechtequipacho, caomotzauc intlatlapoloyan, yequine innomacehualhuan notlan cate innocochiyan, amohuelnonoquetzaz innimitzmacaz.
8 Auh yehuatl intlaçan concemanaz tlatzotzonaz, yenamech ilhuya, intlanel amo quimacaz, intlacamo hualmoquetzaz yehica caicnyuh, yece inipampa teamanaliz çahualmoquetzaz, yuan quimacaz inquezquitetl itechmonequi.
9 Auh innehuatl namechilhuya: Xiquitlahuican, ca amacozque: xictemocan, ca anquittazque: xictzotzonacan, ca amechtlapolhuizque.
10 Cainixquichtin intlatlahui, quicui, yuan intlatemohua, quitta, auh inaquin tlatzotzona, tlapolhuiloz.
11 Auh inamehuantin intla aca tlaxcalli quitlahuiliz itatzin, cuix tetl inconmacaz? Auh intla michin quitlahuilya, cuix cohuatl inconmacaz inmichin ipampohui?
12 Auh intla quitlahuiliz totoltetl, cuix colutl inconmacaz?
13 Auh inamehuantin, inican tlahueliloque, intla oanquiximatque inic anquinmaca amotlatqui amopilhuan; caoccenca tlapanahuiz inilhuicac moyetztica amotatzin quinmomaquiliz inqualli espiritu inquimitlahuililya?
(Dominica III.ª in Quadragesima, pg. 285)
14 Inoc tlalticpac monemityaya intecuyo J. X., cetlacatl itechquinehuaya, yiticcatca, tlacateculutl; auh inyehuatl nontlicatca. Auh inyehuatzin quiquixtili, icniman tlato innontli catca, auh ixquich tlacatl cenca ictlamahuiço.
15 Auh incequintin çanquitoque: Inin caitencopa beelzebub inintlatocauh tlatlacateculo inic quinquixtya inoccequintin tlatlacateculo.
16 Auh incequintin çanicquimoquequelhuiznequya intecuyo, quinequya inmaitla tlamahuiçolli ilhuica titechquimochihuili.
17 Auh inyehuatzin tecuyo, iniquac oquimottili inintlalnamiquiliz, niman quinmolhuili: Inixquich tlatocayutl xelyuhtica amohuecahuaz, icyuhca polihuiz, auh incalli ipanhuetziz inoccentetl calli.
18 Auh intla xelyuhtinemi tlatlacateculo, quenin huecahuaz inintlatocayo? Cainamehuantin anquitohua itencopa inbelzebub niquinquixtya tlatlacateculo.
19 Auh intlanelli itencopa inbelzebub niquinquixtya tlatlacateculo, inamopilhuan ac itencopa inquinquixtya? Ipampa y inamopilhuan amechtlatzontequilizque.
20 Auh intla itencopa inDios niquinquixtya intlatlacatecolo, caçanelli amopan oacico initlatocayutzin Dios.
21 Iniquac tiyacauh moyaochichihua inhuelquipya itecpanchan, mochi huelonoc inquipya.
22 Auh intlaaca occetlacatl huallaz inoccenca chicahuac intlaquipanahuiz, ixquich quicuiliz iniyaotlatqui inicomochicahuacanequya, yuan inixquich itlatqui yaxca quitemamacaz.
23 Inaquin amo notlanca, nechmixnamictya, auh inaquin amo nohuan tecentlalya, çantececenmana.
24 Incenca catzahuac tlacateculo iniquac aca quitlatlacalhuya, nohuiyan quiztinemi intlalhuacpan inamo atlan, quitemohua incanin mocehuiz; auh inacan quitta, niman quitohua: Maocceppa niyauh innochan inompa onihualquiz.
25 Auh inohualla, inoquittac inçacacticac tlachpantli, tlacencahualli.
26 Nimaniquac occeppa yauh, quinnotzaz chicomentin tlatlacatecolo inoccenca quipanahuiya tlahuelilocayotica, auh inocalaque, oncan nemi. Auh initzonquizca inemiliz icoccenca ohuiti inamoyuh achto .
27 Auh inyeyuhqui iniquac oyuhconmitalhui intecuyo, niman cecihuatzintli intlan tzatzic inmacehualtin, quimolhuili: Quemachhuel yehuatl inmonantzin initic otimoyetzticatca, yuan mitzmochichitilli.
28 Niman quimitalhui intecuyo: Huelnelli niquitohua: occenca ye tlacnopilhuiyani inquicaqui yuan quimonemiliztya initlatoltzin Dios.
(Evangelia de Uno Confessore Pontifice, pg. 48)
33 Iniquac tlalticpac monemityaya tecuyo J. X., quinmolhuili initlamachtilhuan. Ayac quitlatya iniyocouh, yuan çanquinaya, amonoman contitlan quitlatya, çantlahuiltetl inicpac quiquetza, inictlachiazque inaquique callaque.
34 Iniyocouh monacayo cayehuatl inmixtelolo. Intla qualli chipahuac mixtelolo, mochitlanextiz inmonacayo; auh intlacamo chipahuacyez, amotlanextiz tlayohualloyez.
35 Auh inaxcan huelxiquitta, intlanextli motechca matlayohualli mocuepti.
36 Yehica intla ixquich chipahuacyez monacayo, inçaniman atleitechyez catzahuac, huelmochitlanextiz, yuhquiman cecatlanextya ocotl icmitztlanextiliz.
(Sequuntur Evangelia de Pluribus Martyribus, pg. 32)
47 Iniquac tlalticpac monemityaya totecuyo J. X., quinmolhuilyaya inmacehualtin Judiome yuan inhuehueyntin teopixque: Oamotlahueliltic, inanquichihua ininnetocaya prophetame; Inamotahuan huelquinmictique.
48 Çanelli amehuantin anquineltilya inic anquinhuelitilya inintlachihual amotahuan; yehica cainyehuantin quinmictique, auh inamehuantin anquinchihuilya ininnetocayan.
49 Ipampay oquimitolhui initeotlamatiliztzin dios: Inhuic niquimomihuaz prophetame yuan apostolome; auh cequintin quinmictizque, yuan quintotocazque;
50 Inictemoloz inimezço Sic ixquichtin prophetame, inonoquyuh ixquichcahuitl tzintic cemanahuac yuan inixquichcahuitl peuhque nicantlaca,
51 Itechhualpehuaz inyezo Abel itechtlamityuh inyezo Zacharias, inmictiloc itzalla altar yuan teopan. Ipampa namechilhuya, temolilozque inicantlaca.
52 Oamotlahueliltic inanteotlatolmatini inoanquicuique tlamatiliz tlatlapolohui; inamehuantin amoancalaque, auh inyehuantin calaquya, anquintlacahualtique.
53 Iniquac quinmolhuili ayay, niman icpeuhque inyehuantin phariseome yuan inteotlatolmatini incenca quinmixnamictya, yuan iquitentzaquaznequi miyectlamantli;
54 Icquimonepachihuyaya, yuan quitemohuaya inmaitla icamacpa quiça, inic quiteixpanhuizque.