10
(In Festo S. Marci Evangelistæ, pg. 395)
1 Iniquac tlalticpac monemityaya tecuyo J. X., quimmixquechili occequintin otecpantin omatlactin omome, yuan oomentin quinmihuali ixpantzinco innohuyan altepetlipan, yuan inizquican inumpa mohuicazquya.
2 Auh quinmolhuilyaya: Camiec immopixcaz, çan quezquin intlatequipanoque, inipixcaque. Ipampa y xicmotlatlauhtilican inmile inaxcahuan, inic quihualmihualiz tlatequipanoque inic quipixquiliquihui.
3 Ximohuicacan: yzcatqui canamechnihuallya yuhquinma amichcacocone intlan incocoyo, inmimiztin.
4 Macamo xiquitquiznequican teocuitlaxiquipilli, amono tlaqualxiquipilli, amono çapatos, manoaca otlica anquitlapalotin;
5 Inçaço canin calitic ancalaquizque, achtopa xiquitocan: Matlamatcayeliztli ye innican calitic;
6 Auh intla onca yez ipiltzin tlamatcayeliztli, ipan mocehuiz inamotlamatcayeliz; auh intlacamo, occeppa amechhualtocaz.
7 Auh çanye nooncan calitic ximotlalican, xicquacan yuan xiquican intlein quipia, intlein inchanca; caintlatequipano huelimacehual initlaxtlahuil. Macamo çancalpan xiquiztinencan.
8 Auh inçaço canin altepetl ipan ancallaquizque, intla amechcelizque, xicquacan intlein amixpan tlalillo;
9 Yuan xiquipatican incocoxcatzitzintin inuncan cate, yuan xiquimilhuican: Amopan hualaciz initlatocayotzin Dios.
(Sequuntur Evangelia de Pluribus Martyribus, pg. 35)
16 Iniquac tlalticpac monemityaya totecuyo J. X., quinmolhuili initlamachtilhuan: Inaquin amechcaqui, nehuatl nechcaqui; auh inaquin amechtelchihua, nehuatl nechtelchihua. Auh inaquin nechtelchihua quitelchihua inonechhualmihualli.
17 Auh hualmocuepque etecpantin omatlactin omome papactihuitze quimolhuilique: Totecuye, inyehuantin tlatlacate notechtlacamati ipampa motocatzin.
18 Yuan quinmolhuili: Niquittaya intlacate yuhquiman tlapetlaniliztli ilhuicac hualhuetzin.
19 Auh izca caonamechmacac inic huelanquinquequeçazque cocohua yuan colome, yuan inixquich ichicahualiz amoyaouh; yuan atle icquinamechihuaz.
20 Yeze macamo icxipapaquican inic amechtlacamati intlatlacate; çanye icxipapaquican, cainamotoca ilhuicac icuiliuhtica.
(Dominica XII.ª Post Pentecosten, pg. 343)
23 Iniquac tlalticpac monemityaya tecuyo J. X., quinmolhuili initlamachtilhuan: Quenmachuel yehuatl inixtelolotli inquitta inamehuantin anquitta.
24 Çanelli namechilhuya, miyequintin prophetame yuan tlatoque quittaznecque inamehuantin axcan yeanquitta, yece amoquittaque, yuan cenca quicaquiznecque inyeanquicaque, çanamo quicaque.
25 Auh niman iquac cetlacatl huelmoquetz tlamatini çan quinahuallatlani intecuyo, quimolhuili: Temachtyanye, tlein nicchihuaz inic niquicnopilhuiz cemicac nemiliztli?
26 Auh inyehuatzin quimolhuili: Inipan teotlatolli tlein icuilyuhtica? Quenin ticpohua?
27 Auh inyehuatl quimonanquilili, quito: Ticmotlaçotiliz inmoteouh, inmotlatocauh ica mochi moyollo, yuan ica mochi manima, yuan ica mochi mochicahualiz, yuan ixquichica motlacaquiliz; yuan tictlaçotlaz inmohuampo inyuh timotlaçotla.
28 Auh intecuyo niman quimolhuili: Huelotitlananquili: yehuatl xicmonemilizti, iccemicac tinemiz.
29 Auh inyehuatl icmoqualtocaznequya, quimolhuili intecuyo J. X.: Auh aquin nohuampo?
30 Auh intecuyo J. X. ahcopa motlachyalti, quimitalhui: Cetlacatl ompa hualiztya inHierusalem, oncan hualtemoc yhierico, inmac huetzico ichtecque, quipepetlauhque, cenca huelquicocoque, çaquinquimatoc inquicauhtiquizque.
31 Auh iquac mochyuh, cetlacatl sacerdote oncan quiz; auh inoquittac, çan conpanahui.
32 Çanoyuh y cetlacatl levita oncan quiçato, inoquittac, çanocompanahuitequiz.
33 Auh cetlacatl Samaria ichan nooncan quiçato, auh inoitlan onacic, inoquittac, cenca icnoyohuac iniyollo, quitlaocolli,
34 Icquilpiti inonca ohuihuitecoc, oncan contequili inazeite yuan vino, yuan icavalo ipan contecac, ompa quihuicac intecochitiloya, oncan quimocuitlahui.
35 Auh imuztlayoc concuic ome pesos, quimacac intecochityani, quilhui: Maxicmocuitlahui; auh intla occequi ipan ticpopoloz, cainiquac nihuallaz, nimitztlaxtlahuitaciquyuh.
36 Quen tiquitta inimomextini, acquehuatl initetlaocolicauh inimac huetz ichtecque?
37 Auh inyehuatl quimolhuili: Cayehuatl inoquitlaocolli. Auh inyehuatzin tecuyo J. X. quimolhuili: Ximohuica, yuan noyuh xicchihua.
(In Festo Assumptionis Virginis Mariæ, pg. 414)
38 Inoc tlalticpac monemitya tecuyo J. X., mocalaquito ceccan altepetlipan, auh inumpa cetlacatl cihuatzintli itoca Martha oquimohuiquili inichan;
39 Auh incihuatzintli oncatca icuton itoca Maria; inyehuatl icuton icxitlantzinco motlali intecuyo J. X., oncan quicacticatca initlatoltzin.
40 Auh inMartha cenca miacpa icmotequipachotinenca intlein itechmonequi tecuyo; inyehuatl niman ixpantzinco moquetz intecuyo, yuan quimolhuili: Notecuyoe, cuix anquen mopatzinco innicuton onechualcauhtiquiz, içannocel nitlachichyuhtinemi?
41 Intecuyo quimonanquilili, quimolhuili: Marthae, Marthae, timotequipachotinemi, miyectlamantli mitztlapololtya.
42 Auh çancentlamantli inmonequi. InMaria occenqualli inoquimopepenili, inahuel cuililoz.