Evangelium secundum
Lucam
1
(In Vigilia Nativitatis Domini Johannis Baptistæ, pg. 246)
5 Imatyan omochyuh inherodes iudea tlatohuani cetlacatl sacerdote itoca Zacharias itechquiz inabia, auh inicihuauh itechpaquiz inichpuchuan Aaron itoca helisabeth.
6 Auh imomextin cenca qualli inyollo catca inixpantzinco dios; imomextin huelipan nenca initenahuatiltzin dios, yuan ipan itequalnemityaya tecuyo cenca pactinenca, amotle icmoyolli tlacohuaya.
7 Yuan ayac inconeuh catca, yehica catetzacatl catca inhelizabeth, yuan ininnehuan yehuecahuaya.
8 Auh omochyuh iniquac oncatca iteopixcatequyuh Zacharias inic tecpantihuiya ixpantzinco dios,
9 Inyuh quichihuani teopixque, itechacico Zacharias inic tlapopuchuiz, oncallac inteopan inichantzinco tecuyo;
10 Auh inixquichtin macehualtin quiyahuac tlatlatlauhtyaya, iniquac tlapopuchihuya teopixqui.
11 Auh oquimonextili iniangel tecuyo, tlamayauhcampa yicac itlan altar inoncan tlapopuchuyaya.
12 Auh inyehuatl Zacharias inoquittac, niman motlapololti, yuan cenca momauhti.
13 Auh inangel quilhui: Macamo ximomauhti Zachariase, ca omohuelcac inmotlatlatlauhtiliz; auh inmocihuauh helizabeth mitztlacatililiz mopiltzin, yuan tictocayotiz Juan;
14 Yuan cenca ictipapaquiz, yuan tahahuiyaz, yuan miyequintin impapaquizque iniquac tlacatiz;
15 Ca huey yez inixpantzinco tecuyo, yuan amoquiz invino, yuan sydra, auh oc yitic ininantzin ictemiz inspiritu sancto;
16 Yuan miyequintin inipilhuan Israel inihuic quincuepaz inteouh intlatocauh;
17 Yuan yehuatl quimoyacaniliz intecuyo inipan inespiritu yuan ichicahualiz Helias; inic quincuepiliz inyollo tetahuan ininhuicpa tepilhuan, yuan inatlaneltocanime inhuicpa quicuepaz ininnematiliz qualli inyollo, inic quicencahuiliz intlacencahualli ialtepetzin tecuyo.
(In Festo Annunciationis B. Mariæ Virginis, pg. 393)
26 Inyeyuh chicuacentetl metztli otztitica santaIsabel, intotecuyo Dios quihualmihuali inAngel sant Gabriel oncan inaltepetl ipan initechpohui Galilea, itocayocan Nazareth;
27 Ihuic quihualmihuali inichpochtli ininamic cetlacatl, itoca Joseph, yuan yolqui David, auh inyehuatzin ichpuchtli itoca Maria.
28 Auh inAngel inoipan mocallaqui ichpuchtli, quimolhuili: Maximopaquiltitye, timotemititica ingratia: motlantzinco ca intotecuyo; inictiyectenehualoni, tiquinmopanahuilya incihua.
29 Inoquimocaquiti y, icmaman momocihui initlatol Angel, yuan ipan moyolnonotzaya, quilnamiqui inquenami intetlapaloliztli.
30 Auh inAngel quimolhuili: Mariae, macamo ximomauhti, yehica inixpantzinco Dios oticmottili ingratia:
31 Izcatqui camitictzinco motlalitzinoz, ticmotlacatililiz inpiltzintli, auh ticmotocayotiliz Jesus.
32 Inyehuatli cenca huey yez, yuan tenehualoz ipiltzin incencahuey Dios, auh intotecuyo Dios quimomaquiliz initlatocaicpaltzin initatzin David; yuan cemicac tlatocatiz inoncan ichan Jacob,
33 Auh initlatocayo aic tlamiz, aic tzonquiçaz.
34 Auh inMaria quimolhuili inAngel: Quenin mochihuaz y, caamo niquiximati inoquichtli?
35 Auh inAngel quimonanquilili, quimolhuili: Camopan hualmotemohuiz inSpiritu Sancto, auh inichicahualitzin occencahuey Dios mitzcehualhuiz. Ipampa y inyehuatzin incenquizcaqualli inmotettzinco tlacatiz, ipiltzin Dios tenehualoz.
36 Yuan izcatqui cainmohuanyolqui Elisabeth yeilama inoiytic motlalli iconetzin; cayeicchicuacentetl metztli y inotztitica, inyehuatl motocayotya tetzacatl;
37 Ca inixquich tlatolli chicahualoni amomaca huelmochihuaz yixpantzinco Dios.
38 Auh insancta Maria quimitalhuitzino: Caiznica innimacehualtzin notecuyo: mayuh nopan mochihua inyuh ticmitalhuya.
(In Festo Visitationis B. Mariæ Virginis, pg. 406)
39 Auh iniquac y, insancta Maria moquetzino, mohuicac inumpa tepetla, mototoquiltitya inumpa altepetl ipan Juda;
40 Yuan mocalaqui inichan Zacharias, yuan quimotlapalhui insancta Elisabeth.
41 Auh inyeyuhqui insancta Elisabeth inoquicac itlapaloliz sancta Maria, inpiltzintli papac, ahauixque inoncan yitic; auh inyehuatl sancta Elisabeth ic onten Espiritu sancto:
42 Yuan cenca tzatzic, quito: Inic tiyectenehualoni, tiquinpanahuya cihua, auh yectenehualoni inmoconetzin initictzinco metztica.
43 Auh canmanomacehual, inic yehuatzin inantzin notecuyo nechhualmottiliz?
44 Caizcatqui, cainiquac oniccac motetlapalolitzin, inpiltzintli cenca oahauix papaquiliztica innitic.
45 Auh quemachhuel tehuatzin inotimotlaneltoquiti, yehica caneltiz inomitzmolhuili tecuyo.
46 Auh insancta Maria quimitalhui: Innanima quimohuecapanilhuya intecuyo;
47 Auh innoyolya opapac itechcopatzinco inDios.
(In Festo S. Johannis Baptistæ, pg. 401)
57 Otlaimmantic inic tlacachihuaz Elisabeth, auh oquitlacatili oquichpiltzintli.
58 Auh inoquicacque icalnahuactlaca, yuan ihuanyolque, caintotecuyo cenca ipan oquimohueylilli initetlaocoliliz, auh ihuantzinco papaquya insancta Elisabeth.
59 Auh inyeyuhqui inyeichicueilhuiyoc huallaque, inic achiquitequilizque ininacayo piltzintli, auh quitocayotyaya initoca itatzin Zacharias.
60 Auh quinnanquili ininantzin, quito: Caçanniman amo, caJuan itocayaz.
61 Auh quilhuique: Ca ayac mohuanyolqui yuhqui itoca y.
62 Auh çamachiyotica, quitlatlanyaya initatzin intlein huelquitocayotiznequi.
63 Inyehuatl conitlan tlacuiloloni, çanquicuillo, quito: CaJuan itoca. Niman ixquichtin tlamahuiçoque.
64 Auh niman otlapouh initlatol, yuan ininenepil, auh tlatohuaya quimoyectenehuilyaya inDios.
65 Auh momauhtique inixquichtin icalnahuactlaca; auh inixquich intlatolli tepan actimotecac innohuyan tepetla ompa Judea.
66 Auh inixquichtin quicacque huelinyolloitlan quitlallique, quitoque: Quenami yez y inpiltzintli? Yehica cainimatzin inihuelitilitzin tecuyo quimopielyaya.
67 Auh inZacharias initatzin inoten espiritu sancto, yuan tlaachtopa ito, quito:
68 Mamoyectenehua inintlatocauh ininteouh Israel, yehica caoquimottilico yuan oquinmomaquixtilico inimacehualtzin.