Prophetia
Joël
2
(Feria Quarta Cinerum, pg. 73)
12 Izcatqui quimitalhuya totecuyo, amocenyollocopa nohuicpa ximocuepacan, neçahualiztica, choquiztica, ixayotica;
13 Auh xictequican inamoyollo, amoyehuatl inamotilma; yuan ximocuepacan ihuitzinco amoteouh amotlatocauh, yehica cacenca moteicnoittilyani, cenca motetlaocolilyani, cenca motlapaccaihiyohuilyani, auh cencahuey initetlaocolilitzin, yuan amoicyuhca motetlatzacuiltilya ipampa intlatlacolli.
14 Aquin huelquimati inaço hualmocueptzinoz totecuyo yuan motetlapopolhuiliz; yuan quimocahuilityaz initeteochihualitzin? Maahuyac ixpantzinco ticmanacan intoteouh, intotlatocauh.
15 Xicpitzacan intlapitzalli inoncan Syon, xiqualtilican inamoneçahualiz, ixquich tlacatl xicnotzacan,
16 Xiquincentlalican inmacehualtin, xiccenquizcaqualtilican iniglesia, xiquinnechicocan inhuehuetque, xiquincentlalican inpipiltotontin yuan inocchichi; inomonamicti oquichtli manhualquiça inicochyan, yuan incihuatl namique inoncan ineyan.
17 Insacerdotes initetlaecolticahuan dios chocazque icalixaya inteopan yuan ixpan altar, quitozque: Totecuyoe, maxitechmotlaocolili, maxicmotlaocolili inmomacehualtzin; auh macamo xicmocahuili inmaxcatzin inicpinauhtiloz, inic ipantlatocatizque inoccequintin altepetl ipantlaca, tleica inaltepetl ipan tohuicpa itto: catli campaca ininteouh?
18 Intecuyo dios oquimotlaçotili inyaltepetzin, yuan oquinmotlapopolhuili inimacehualhuan.
19 Inicocceppa huellamochihuaz inintlalpan, intotecuyo omotlatoltin, yuan oquinmolhuili inimacehualhuan: Izcatqui nehuatl namechmacaz tlaolli, yuan vino, yuan azeite, yuan icamoyollo pachihuiz; aocmo namechpinauhtiz inimixpan tlateotocanime.
Yehuatli inquimitalhuya dios ixquichihuelly.
(Feria Sexta Quatuor Temporum, pg. 237)
23 Inin quimitalhuya tecuyo dios: Xahahuiyacan inamichpuchuan Syon, yuan ihuictzinco xipahpaquican inamoteouh amotlatocauh, yehica caoamechmomaquili inquitemachtyani qualli melahuac, yuan amopan quihualtemohuiz inyohualquiyahuitl yuan huecahuaz inyuh yitzinechcan.
24 Yuan inamocuezcon tetehmiz intlaolli, yuan inamotlapatzcayan pepexohuiz invino yuan azeite.
25 Yuan ixiptlayohuaz inizquixihuitl ipan tlachapolqualoc intlaquaque, ocuilime, yuan inquaqualoc amaxca, yuan inchiyahuiçohuac; huey innochicahualiz amopan noconihua.
26 Yuan antlaquazque, ampachihuizque; yuan anquimoyectenehuilizque initocatzin amoteouh amotlatocauh, intlamahuiçolli amotlan oquimochihuilli; yuan inmochipa cemicac nimanayc pinauhtilozque innomacehualhuan;
27 Yuan anquimatizque, cainnepantla nica inisraeltlaca; yuan nehuatl namoteouh, namotlatocauh, nimanayac occe; yuan inic mochipa cemicac nimanayc pinauhtilozque innomacehualhuan. Quimitalhuya intecuyo ixquichihuelli.