Epistola B. Pauli Apostoli
ad Hebræos
1
(Ad Magnam Missam, pg. 374)
1 Noteiccahuane, intotecuyo Dios miecpa yuan miectlamantli inyehuecauh icquinmononochili intetahuan ica inintlatol prophetame;
2 Auh inaxcan çatepan çatlatzaccan inotechmononochili huel ica initlatoltzin itlaçopiltzin, inoixquich quimaxcatili, yuan icatzinco oquimochihuili inixquich tlachihualli.
3 Auh yehica cainyehuatzin itlanextyaya initlaçotatzin, yuan huel quimonenehuilya inicteotl, yuan inixquich imactzinco catqui, ixquich quimopialya ica inichicahualiztlatoltzin, quimopopolhuya intlatlacolli, imayeccampatzinco moyeztica incencahuey icmahuiztic inilhuicatlitic;
4 Noyuh cenca qualtiliztica oquinmopanahuili inangelome, inquenin cenca occentlamantli tocaitl oquimocuili inamoyuh yehuan.
5 Cuix mayca ceyehuantin inAngelome quimolhuili: Intehuatl catinopiltzin, nehuatl axcan onimitztlacatili?
6 Auh yenoceppa: Innehuatl canitatzin nyez, auh inyehuatl canopiltzin yez? Auh iniquac occeppa techmottitili inçanhuelicel ipiltzin innican tlalticpac, quimitalhuya: Inyehuatzin maquimoteotican inixquichtin inAngelohuan Dios.
7 Auh inintechpa Angelome quimitalhuya: Inyehuatzin iniAngelohuan quinmotitlaniya auh initetlayeculticahuan yuhquintlecueçalo tletl quinmochihuilya.
8 Auh quimolhuilya initlaçopiltzin: Diose, inmotlatocaicpaltzin mochipa cemicacca; mellahuacatlatzontequiliztopilli, inmotlatocatopiltzin.
9 Oticmotlaçotili inixquich qualli, inmellahuac, yuan oticmotelchihuili inixquich amoqualli, inamomelahuac; ipampa y omitzmomamatilhui inteotl, inmoteouh, ica inpapaquiliz oleo, inamomachyuhque mocnihuan.
10 Auh: Intehuatzin, totecuyoe, huelachto ticmochihuilli, ticmopehualtilli intlalticpac, yuan inilhuicatl caitlachihual inmomatzin.
11 Inin capolihuiz, auh intehuatzin mochipa timoetztyaz; yuan inixquich inilhuicatl inmacaçantilmatli içolihuiz;
12 Yuan inmacaçantlatlapachyuhcayotl ticmopatiliz, auh mopatlaz; auh intehuatzin çanyetehuatzin timoetztica, auh inyehuatl inicmochipa timoetztica, ayc tlamiz.